CAGAYAN DE ORO CITY-Masaligon si Cagayan de Oro 2nd District Cong Maximo Rodriguez nga ang Bangsamoro Organic Law o BOL mao ang sulbad sa kagubot sa Mindanao.
Kini bisan paman sa pahayag ni BIFF spokesperson Abu Misri Mama, nga dili solusyon sa kagubot sa Mindanao ang BOL ug dili kini sulbad sa kagubot tungod kay mga lider lamang sa nasud ang makapahimulos niini.
Si Rodriguez miingon nga mayoriya sa atong mga igsoong Muslim ang nalipay sa paglagda sa BOL ni Pres Rodrigo Duterte.
Gi-awhag usab ni IFI Bishop Felixberto Calang ang gobyerno nga makigdayalogo sa tanang tribu sa mga Muslim.
Kini nunot na sa gihimong pagpirma ni Pres Duterte sa BOL.
Siya miingon nga kinahanglang masabtan sa gobyerno sa nasud ang tinubdan sa giyera ug mahibal-an usab niini ang reaksyon sa panig sa MILF, MNLF ug sa BIFF nga dakong supak sa BOL.
Samtang gibutyag ni Cong Rodriguez nga business as usual na ang mga magbabalaod sa Kongreso.
Kini may kalabutan sa nahitabong tensyon nunot na sa panag-inilogay sa House speaker post.
Sumala ni Rodriguez nga balik na sa normal ang sitwasyon ilabina nga daghang mga balaod ang ilang giprayoridad sama sa pagtuki sa budget.
Sya miingon nga wala sila magpaapekto sa nahitabong kagubot ilabina nga maoy ilang tahas ang pagserbisyo sa katawhan.
