CAGAYAN DE ORO CITY – Uyon si Cagayan de Oro 2nd District Representative Rufus Rodriguez nga mobalik ang Pilipinas nga aktibong miembro sa International Criminal Court o ICC.
Kini aron dunay tinud-anay nga pag-ila sa international community ang Pilipinas pag-abot sa isyu sa promosyon sa tawhanong katungod ug proteksyon niini.
Apan giklaro ni Rodriguez nga pagbalik-miembro sa Pilipinas sa ICC wala nagkahulugan nga makapanghilabot na sila sa internal affairs ilabina sa trabaho sa mga korte nga naghawid sa mga kaso.
Siya miingon nga walay luna ang ICC nga mag-apil apil sa aktibo ug naglihok nga hudikatura sa Pilipinas sukwahi sa gipamugos sa mga nagtinguha modu-ot sa kanhi Duterte administration nga giakusahan sa extra judicial killings issue.
Siya miingon nga angay imbestigaran ang pasangil sa EJK apan trabaho sa local functional courts ang pagsulbad niini ug walay labot ang ICC.
Dugang ni Rodriguez nga nawala na lang sa poder si kanhi Pres Rodrigo Duterte apan walay bisan usa ka kritiko nga nangahas pagduso’g kaso may kalabutan sa EJK sa korte apan sa ICC na hinoon nga walay hurisdiksyon sa Pilipinas.
