CAGAYAN DE ORO CITY – Dakong supak si Cagayan de Oro 2nd District Representative Rufus Rodriguez nga gub-on aron mabag-o ang tibuok istraktura sa Carmen Bridge nga natukod ug napuslan sa unang katawhan sa syudad sugod tuig 1946 pa.
Kini maoy prangka nga gipadayag ni Rodriguez sa gihimong public consultation meeting sa Department of Public Works and Highways o DPWH -10 sa dakbayan sa sulod ning bulana.
Miingon ang kongresista nga angayang magpabiling important historical marker ang maong tulay kay protektado usab kini sa Republic Act 10066 o National Cultural Heritage Act of 2009.
Siya miingon nga dako hinoon kining uyon dunay ipatuman nga full repair ug rehabilitasyon aron mapalig-on pa ang maong tulay alang sa mga tawo ug mga sakyanan nga tig-agian niini.
Mitapos sa pagsulti ang kongresista nga giduyugan niya ang baruganan sa local historians nga proteksyon ang mga pipila ka butang nga nagtangag sa kasaysayan sa dakbayan.
Dugtong niini,gipasalig usab ni DPWH 10 Planning and Design Division chief Engr Sabeniano Caliao nga sundon nila ang sugyot ni Rodriguez nga ma-preserbar ang iconic Carmen Bridge.
Hisayrang bisan si Cagayan de Oro 1st District Cong. Lordan Suan ang una nang nagpadayag suporta sa Kagay-an Heritage Advocates nga babagan ang paghilabot sa DPWH 10 sa maong tulay nga sugdan unta ning tuiga.
