CAGAYAN DE ORO CITY – Supak si Cagayan de Oro 2nd District Cong. Rufus Rodriguez nga gub-on ang istraktura sa pinakaunang tulay nga mas naila nga Carmen Bridge nga nagbarog na panahon sa Spanish era dinhi sa syudad.
Kini ang reaksyon ni Rodriguez kabahin sa plano sa dakbayan nga gub-on ang maong tulay tungod sa kagabok na sa pundasyon subay sa rekomendasyon sa DPWH engineers.
Apan giklaro usab sa kongresista nga dako siya nga uyon nga maluagan ang maong tulay haom sa kagustuhan ni City Mayor Rolando ‘Klarex’ Uy nga himoong four lanes nga gi-target sugdan sa sunod tuig.
Samtang gipadumduman ang city govt nga moagi sa ensaktong konsultasyon ayha mohimo sa plano nga pagguba ug pagbag-o sa maong tulay.
Kini ang mensahe ni Philippine National Historical Commission chairman Dr. Emmanuel Calario kabahin sa plano sa city govt nga pagtandog sa labing karaang tulay sa dakbayan.
Miingon si Calario nga dili mahimong mabalewala ang balaod nga naghatag proteksyon sa kultura ug kasaysayan sa usa ka butang o lugar sama dinhi sa dakbayan.
Una nang misupak ang local historians nga gub-on ang tulay apan uyon sila nga sirado kini sa mga sakyanan ug mga tawo na lang ang tugtan nga ipaagi niini.
