CAGAYAN DE ORO CITY – Gitambagan ni Cagayan de Oro 1st District Cong. Lordan Suan ang karaang board of directors sa Cagayan de Oro Water District o COWD nga undangon na ang pagsupak-supak sa mando ni Pres Bongbong Marcos.
Kini nunot sa pag-takeover sa Local Water Utilities Administration o LWUA sa COWD operations apan wala respetuhi ug ilha sa unang hugna sa hunta direktiba.
Namahayag si Suan nga nagpalusot na lang ang COWD board of directors ug general manager sa ilang katarungan nga mamiligro kini nga kasuha’g administratibo aron pabiling magkupot sa gahom taliwala sa kamanduan ni Marcos.
Ang COWD-Cagayan de Oro Bulk Water Incorporated disputed payables ang pinaka-rason kon nganong mihimo’g aksyon ang Malakanyang nga temporaryong dumalahon sa LWUA interim board of directors ang water district.
Samtang gilayong mohawa sa katungdanan ang regular COWD of directors ingon man ang general manager sa higayon nga mosulti ang Office of the Government Corporate Counsel o OGCC nga legal pag-takeover sa LWUA officials sa sistemang panubig sa syudad.
Kini ang pasalig ni regular COWD General Manager Engr Antonio Young nunot sa pag-kuwestiyon ni Suan kon nganong gisupak nila ang mismong mando ni Marcos nga gihatag ngadto sa LWUA.
Namahayag si Young nga dili sayon ang gilayong paghawa sa pagdumala sa COWD sanglit mosamot ka-apektado ang serbisyo sa katawhan kon walay igong basehan ang pagsulod sa interim board of directors ug bag-ong general managers nga pulos tinudlo sa LWUA.
Samtang gipasalig ni interim COWD General Manager Fermin Jarales nga dili dugang suliran ang ilang presensiya apan pagpangita’g sulbad sa kahimtang-pinansyal ug operasyonal sa COWD.
Kini ang pagpasabot ni Jarales kon nganong gitahasan sila sa LWUA nga sudlan una ang COWD nunot sa pagka-putli’g supaly sa tubig epekto sa wala pagbayad sa ilang obligasyon ngadto sa kompanyang Metro Pacific Water ni Manny V.Pangilinan.
Namahayag usab kini nga kamulo na sila nga imbestigar sa angay pang-susihon nga mga isyu sa COWD aron mahatagan sa sulbad sulod sa unom ka bulan nga gitugot kanila sa nat’l govt.
