CAGAYAN DE ORO CITY – Gitakdang ipatubag sa Commission on Elections ang kampo ni Cagayan de Oro 1st District Cong. Lordan Suan sa giingong naghinobra kadayag nga pasangil sa vote buying may kalabutan sa May 12 elections ning syudad.
Kini human miduso’g disqualification case ang giingong mga botante nga dayag nakasaksi sa maong kalihukan sugod May 6 hangtod 11.
Miingon ang abogado ni Kap Kikang Uy nga si Atty Al Geñoso nga dili kini ilang kaugalingong kalihukan apan mismo sa pipila ka residente nga wala makaangay sa grabeng pinalitay sa mga boto nga giingong nahitabo sa pinuy-anan ni Suan.
Gipildi ni Suan si Kikang sa laing higayon nila nga panagsangka pagka-kongresista sa unang distrito ning syudad.
Samtang andam tubagon ni Suan ang disqualification case nga gisang-at sa kampo sa political supporters ni Uy sa Comelec-Manila.
Miingon si Bert Amplayo,asst director sa buhatan ni Suan nga nasayod na ang ilang bando ug naghulat na lang sa opisyal nga kopya aron mohatag sa ilang katin-awan.
Siya miingon nga wala una mohatag sa direktang reaksyon ang kampo ni Suan kay nagpaubos una sila sa health recovery epekto sa grabe kahago nga kampanya sa milabay’ng eleksyon.
