CAGAYAN DE ORO CITY – Gilauman ang panagtigi sa pagka-mayor sa kanhi magka-alyado sa politika nga si incumbent City Mayor Rolando ‘Klarex’ Uy ug former City Mayor Atty. Oscar ‘Oca’ Moreno sa syudad sa 2025 elections.
Kini human kompirmaha ni Cagayan de Oro 1st District Cong. Lordan Suan nga si Moreno ang dad-on sa Partido Padayon Pilipino -Cagayan de Oro subay sa nauyunan sa gihimong panagtigom sa usa ka hotel ning syudad.
Siya miingon nga dili lang una kini mohatag sa dugang komento apan iyagyag nila ang tanan pag-abot sa higayon nga makaduso na sila’g sertipiko de kandidatura sa Commission on Elections sa petsa 7 sa Oktubre ning tuiga.
Dugang ni Suan nga mahibaw-an usab sa publiko kon kinsa ang napili nila nga bise-mayor ug kongresista sa distrito dos ingon man mga konsehales sa sunod semana.
Dumduman nga lauman nga init ang panagtigi ni Klarex ug Moreno pagka-mayor sanglit pulos sila dunay dala nga puwersa.
Si Klarex magpa-pili pa lang sa iyang ikaduhang termino pagka-mayor samtang si Oca naka-serbisyo na’g siyam ka tuig ug naikag mobalik kay nausik lang ang nakab-ot nga kalambuan sa dakbayan.
Hisayrang una nang nag-deklara sa line up ang ONE KAGAY-AN,KAUBAN ANG KATAWHAN COALITION ni Klarex ug Cong. Rufus Rodriguez kuyog sa ilang mga konsehal ingon man kandidato pagka-kongresista ug partylist representatante.
