CAGAYAN DE ORO CITY – Gibatikos ni kanhi Pres Rodrigo Duterte si Negros Oriental 3rd District Cong. Arnolfo ‘Arnie’ Teves Jr.
Kini human nalakbitan sa kanhi presidente ang isyu sa kamatayon ni Negros Oriental Gov. Roel Degamo atol sa iyang pagdawat sa resolusyon nga nag-ila kaniya nga adopted son dinhi sa syudad kagahapong adlawa.
Miingon si Duterte nga droga ang nag-unang tuyo nga iyang gitoohan kon nganong gipatay si Degamo sa miaging unang semana ning bulana.
Gihulagway ni Duterte si Teves nga tinubdan sa daghang kagubot sa maong probinsya ilabina ang mga kaso sa pagpatay.
Nag-komedya pa kini nga magpasalamat si Teves kay wala kini maapil sa isyu sa extra judicial killings.
Una nang namugos si Teves nga dili usab angay isalikway ang isyu kabahin sa mga bangi sa negosyo ang rason kon nganong giipit kini sa kamatayon ni Degamo.
