Gihangyo sa mga miyembro sa National Unity Party (NUP), nga gipanguluhan ni Deputy Speaker Ronaldo Puno, sa House committee on ethics and privileges nga imbestigaran ang pamatasan sa kanhi miyembro sa ilang partido nga si Cavite 4th District Rep. Kiko Barzaga, tungod sa giingong paglapas sa Code of Conduct.
Miingon si Puno, adunay upat ka posibleng kalapasan nga nabuhat ni Barzaga: Una, mihatag kini’g buling sa dungog sa lower house; ikaduha, mihimo siyag lakang nga supak sa balaod, moralidad, batasan, ug pampublikong palisiya; ikatolo, nagpakita siya sa pamatasan nga nag-awhag sa sedisyon o rebelyon; ug ika-upat, gipakita ni Barzaga sa pamatasan nga makadaot sa interes sa serbisyo ug dili angay sa usa ka miyembro sa Kongreso.
