CAGAYAN DE ORO CITY – Subli gibuhi ni City Mayor Rolando ‘Klarex’ Uy ang kagustuhan nga ma-rescind o usbon ang unod sa ang kontrobersyal nga kontrata tali Cagayan de Oro Water District o COWD ug Cagayan de Oro Bulk Water Incorporated o COBI nakatawag sa atensyon sa natl govt sa miaging Mayo ning tuiga.
Kini human gibutyag sa iyang tigpamaba nga si Janboy Actub nga nagpabilin ang baruganan sa city govt nga dakong supak sa otomatikong kada-tulo ka tuig nga pag-usbaw sa bayrunon sa tubig ngadto sa katawhan sa dakbayan.
Miingon si Actub nga dili siya supak nga padayon ang serbisyo sa COBI apan angayang wad-on kadto nga porbisyon sa kontrata kay mabug-ata’g samot ang katawhan.
Apan alang kang kanhi City Mayor Oscar Moreno nga palusot na lang sa grupo ni Uy ang pagsupak sa probisyon sa kontrata nga adunay pagsaka sa bayrunon sa tubig kada-tulo ka tuig.
Miingon si Moreno nga politikanhong interes ang tumong sa city hall gamit ang isyu sa COWD ug COBI.
Siya miingon nga dili pa igo,gisulayan pa’g pangilkil sa mga sakop sa city hall ang kompanyang MetroPacific sa kauluhan apan wala kini magpadala sa ilang diktar.
Una nang namahayag si Moreno nga gigamit siya isip pa-on alang sa politikanhong interes sa grupo ni Klarex.
Samtang namahayag usab si Klarex nga dili kalikayan nga mapasanginlan nga politika ang nag-unang motibo kon nganong mihimo’g lakang ang city govt sa isyu sa COBI ug COWD.
Apan namugos si Uy nga dili kini moabot sa maong puntod kon nagtinarong pa sa pag-atiman ang kanhi administrasyon sa panubig sa dakbayan.
Miingon si Uy nga bisan sa nasundan niya nga suliran apan wala niya kini likayi apan gipangitaan sa sulbad aron mabalik sa normal ang kahimtang sa COWD.
Hisayrang dunay gibutang nga interim officials sulod sa COWD apan wala kini ilha sa mga empleyado niini.
