CAGAYAN DE ORO CITY – Detinado una sa mini-cell sa kapolisan ang passsenger cooperative bus unit nga unang nakabangga-patay sa motorista sa highway sa Barangay Aplaya, Jasaan,Misamis Oriental.
Giila ang biktimang nagmaneho-motorsiklo nga si Maybolin de la Cruz,legal ang edad ug residente sa Barangay Mintabon,Talisayan ning lalawigan.
Saysay sa imbestigasyon nga pasulod sa Cagayan de Oro ang biktima gikan sa ilang lungsod samtang padulong usab sa Balingasag ang bus driver nga si Henly Catalan nga residente sa Bukidnon dihang natigayon ang bangga.
Subay sa mga testigo, dunay gusto unhan nga passenger jeep si Catalan dihang gikasungag usab niini ang motorsiklo.
Paspas gidala ang biktima apan wala na maluwas sa mga doktor ang kinabuhi.
Kon walay kasabutan makab-ot, mag-atubang sa kasong kriminal ang bus driver sa piskalya sa buhatan sa prosekusyon ning lalawigan.
