CAGAYAN DE ORO CITY – Pursigido mokaso’g kriminal ang beterano nga maniniyot o photo journalist nga aktibong sakop sa Cagayan de Oro Press Club o COPC nga koresponsal usab sa mga mantalaan nga Philippine Star ug Mindanao Daily batok sa taxi driver nga mibangga kaniya ning syudad.
Kini human ipatala ni Gerry Gorit ang nahitabo kaniya batok sa nakasibat nga drayber nga nagmaneho sa taxi nga dunay plaka numero KAR 9549 ug body number nga RX-0106.
Sumala ni Gorit, nga nagkauyon sila sa wala maila nga taxi driver nga pangitaon ang usa ka lokasyon nga gusto niya dalikyatan niadtong Martes.
Apan mi-resulta sa init nga panaglalis dihang pakyas nila matumbok ang gipangita nga lokasyon.
Kini ang rason nga mihangyo na lang si Gorit nga mokanaug sa usa ka gasolinahan sa J.R Borja Extension sa maong adlaw.
Sa pag-plete sa biktima gamit ang 500 pesos,naglantugi na usab sila kay walay sukli.
Sa pagtoo nga ihatag sa ensaktong paagi dihang napasuklian na ang salapi sa gasoline station,giingong giisa kini sa maong drayber ngadto kang Gorit.
Gilayong nakuhaa’g hulagway sa media practitioner ang taxi apan imbis nga mangayo’g pasaylo,gibanggaan na hinoon kini ayha misibat sa wala matino nga direksyon.
Naligsan ang paa ni Gorit rason nga nahulog ang iyang mga gamit nga naglakip sa laptop ug mga kamera.
Nahiagom sa leg injury ang biktima subay sa seritipikasyon gika sa Northern Mindanao Medical Center ug damyos usab ang iyang media equipement.
Tungod niini,kasuhan niya ang maong driver sa physical injury and damage to property ug pagpa-rebokar sa lisensiya niini sa Land Transportation Office 10 ning syudad.
