CAGAYAN DE ORO CITY – Gipasalig ni Comelec chairman Atty George Erwin Garcia nga dili maapektuhan ang preparasyon ug pagpahigayon sa 2025 midterm elections sa nasud.
Kini bisan kon gikasuhan siya’g kurapsyon sa pipila ka tawo nga gitoohang mga sinugo ug binayran sa kompanyang Smartmatic nga unang wala na dawata sa ahensiya.
Miingon si Garcia nga labing maayo nga may kaso na nga gipasaka kontra kaniya aron matubag na siya sa ensakto ang pasangil nga midawat kini sa uno bilyones pesos nga suburno aron pabora ang Philippine-Korean joint venture Miru System Company Limited nga gamiton sa automated elections sunod tuig.
Samtang nakahatag sa taas nga moral alang sa mga empleyado sa Comelec ang kaisog ug baruganan ni Garcia bisan sa pasangil sa kurapsyon didto sa kauluhan.
Kini ang nakita ug nabati ni Comelec 10 regional director Atty Renato Magbutay ngadto sa mga empleyado nga makighugoy-hugoy kang Garcia.
Siya miingon nga klaro nga pagguba sa kredibilidad sa Comelec ang tumong sa pipila ka tawo nga namasangil sa bribe issue kontra sa ilang top officials.
