Misupak si Committee on Cultural Communities Chairperson, City Councilor Roberto Cabaring sa House Bill 621 atol sa iyang special report sa sesyon sa konseho niadtong Lunes sa hapon.
Siya nag‑awhag sa pagpahigayon og committee hearing aron matuki pag‑ayo ang maong panukala.
Ang House Bill 621, nga una nang gipasa sa Kongreso niadtong Marso 21, nagtumong nga ibalhin ang katungod sa pagparehistro ug pagdumala sa mga ancestral land gikan sa National Commission on Indigenous Peoples (NCIP) paingon sa Department of Environment and Natural Resources (DENR).
Matud sa mga kritiko, ang maong lakang posibleng makadaot sa proteksyon sa katungod sa mga lumad ug makapaluya sa Indigenous Peoples Rights Act (IPRA) sa tuig 1997.
Sa Cagayan de Oro, nagkahiusa ang mga lider lumad sa ilang pagsupak pinaagi sa kampanya nga “No to House Bill 621”, diin ilang giingon nga ang balaod dili reporma kundili pagbalhin sa kontrol sa ancestral lands.
Isip tubag sa nagkadaghang kabalaka, gi‑awhag ni Cabaring ang pagpatawag og committee hearing ug pag‑imbitar sa mga representante gikan sa NCIP, mga non‑government organizations, Office of Cultural Affairs, ug Department of Justice aron makahatag og ilang posisyon ug komento.
Tumong niini nga proseso mao ang transparency ug ang paghimo og pormal nga opposition paper nga mahimong basehan sa konseho sa pagpasa og resolusyon batok sa House Bill 621, kauban ang mga indigenous peoples barangay.
