CAGAYAN DE ORO CITY – Gisugyot ni administration City Councilor Eric Salcedo nga palugwaan sa resolusyon diin maghatag pagtugod sa konseho nga magamit ang balor 26 milyones pesos nila nga sports funds ug travel allowance alang sa apektadong katawhan sa enhanced community quarantine sa dakbayan.
Kini maoy nahuna-hunaan ni Salcedo tungod sa langan nga pagtunol sa ayuda sama sa pagkaon sa matag-pamilya nga pinugngan ang paggawas sa balay epekto sa delta variant sa COVID-19.
Miingon ang konsehal nga gusto usab niya nga dunay resolusyon diin mokaltas sa ilang usa ka bulan nga suhulan isip pangdugang sa tabang sa katawhan nga apektadon sa pandemya sa syudad.
Samtang gihagit ni opposition City Councilor Jocelyn Rodriguez ang mayoriya nga direktang moduol kang City Mayor Oscar Moreno aron mas mapadali pa ang mobilisasyon sa tabang nga angay mahatag sa katawhan ning syudad.
Kini human mibati’g kaibog si Rodriguez nga mas una pa nakapanghatag ang sa food packs ang Gingoog City gikan sa DSWD-10 itandi sa Cagayan de Oro nga pulos unta napaubos sa enhanced community quarantine.
Miingon si Rodriguez nga mibati siya’g kaulaw sa hinay nga lihok sa syudad ug kabahin usab kini sa andam modonar sa iyang suhulan ug pondo haom sa sugyot ni Kag Eric Salcedo.
Sa pikas bahin,dili suliran ang pagdonar sa usa ka bulan nga suhulan sa mga konseho nga naglakip na sa buhatan ni City Vice Mayor Rainer Joaquin ‘Kikang’ Uy alang sa tabang-pinansyal o food packs sa katawhan sa dakbayan.
Apan giklaro ni Uy nga wala sa gahom sa konseho nga mohilabot sa pondo nga naka-alokar sa ubang katuyuan kay may balaod nga angay sundon niini.
Miingon si Uy nga maaoy unta ang maong sugyot apan angayang likayan ang paghatag sa ‘false hope’ sa katawhan apan walay mahatag sa kinaulahian.
Dugtong usab niini,gisunod lamang sa city govt ang nalatid nga proseso sa paggawas ug paggamit sa pondo aron itabang sa apektadong mga pamilya sa ECQ sa syudad.
Kini ang gipasabot ni acting City Administrator Teodoro Sabuga-a nunot sa pipila ka reaksyon kon nganong angayang ipaubos sa profiling ang mga pamilya o sektor nga angay tabangan kay apektado sa pandemya.
Miingon si Sabuga-an nga kon sila ang pagbut-on, mahimo nga gilayon nila ihatag ang tabang apan gisiguro lamang niini ilabina nga nagkadaghan ang angay tabangan sa syudad.
