CAGAYAN DE ORO CITY – Nakakuha sa paborabli nga hukom sa sala ni Regional Trial Court Branch 41 Presiding Judge Jeoffre Acebedo ang giingong pribadong petisyoners sa tumong nga dili na subli maputlon sa Cagayan de Oro Bulk Water Incorporated o COBI ang suplay sa tubig sa dakbayan.
Kini human unang miduso’g petisyon sila kanhi City Councilor Eric Salcedo ug Ronnie Waniwan sa korte aron makakuha’g writ of preliminary injunction o WPI samtang anaa sa pagsulbad ang COBI ug Cagayan de Oro Water District o COWD sa isyu sa utang.
Miingon ang abogado sa duruha nga si Atty.Gregorio Pallugna nga kadaugan kini sa katawhan nga hukom sa korte.
Kini tungod kay mag-atubang sa bug-at nga silot sa balaod ang COBI kon mangahas sila pagputol sa tubig samtang wala pa ma-resolba ang aksyong-legal sa gikuwestiyon nga probisyon sa kontrata sa panubig sa syudad.
Una nang namahayag usab ang abogado sa COBI nga si Atty Roberto Rodrigo nga ‘pointless’ na ang nakuha sa petitioners nga WPI kay mismo na si Metro Pacific Water bigboss owner Manny V. Pangilinan ang nagpasalig kang Pres Bongbong Marcos nga wala na’y putol sa tubig nga mahitabo.
Kini usab ang rason nga gipasudlan ni Marcos sa Local Water Utilities Administration o LWUA ang COWD aron mabadbad ang daw gapos sa politika ug impluwensiya sa city hall sa isyu sa disputed payables tali COBI.
Dumduman nga mayoriya sa board of directors sa COWD ang tinudlo sa city government diin nagtoo ang uban sa katawhan sa syudad nga sila gidiktahan ilabina pag-abot sa isyu sa pagsulbad sa bayrunon ngadto sa COBI.
Hisayrang namugos usab ang city water district nga wala sila’y angay bayran nga utang.
Kini tungod kay dili kini makita sa ilang book of accounts samtang gikuwestiyon sa city govt ang legalidad sa 30-years contract tali sa COWD ug COBI.
