CAGAYAN DE ORO CITY – Susihon nila ni IATF-National Implementor OPPAP Secretary Carlito Galvez ug CORDS-10 head PCOO Secretary Martin Andanar ang mga paagi kon giunsa ang pagpakigbatok sa lokal nga pangagamhanan ang coronavirus disease sa syudad.
Kini human ania sa syudad sila si Andanar ug Galvez diin gilauman nga mouban sa virtual daily press briefing sa city hall ning adlawa.
Miingon si City Mayor Oscar Moreno nga nag-unang tuyo sa duha ka kalihim nga masayran kon nganong padayon ang pagsaka sa positibong kaso ning syudad.
Samtang gikompirmar usab ni Dept of Health 10 Director Dr Adrinao Suba-an nga mohimo sa tulo ka hugna nga trainors training si contact tracing czar Baguio City Mayor Benjamin Magalong sa syudad ning adlawa.
Kini human ania usab sa dakbayan si Magalong aron mapalig-on ang mga paagi sa local govt units ug PNP sa rehiyon kon unsaon pagpakigbatok ang coronavirus.
Miingon si Suba-an nga hayan himoon ang training sa mga partisipante sa mismo nga buhatan sa DoH-10 sa syudad.
