CAGAYAN DE ORO CITY – Gipalig-on pa Dept of Health 10 ang testing capacity batok sa pagkuyanap sa coronavirus disease dinhi sa Northern Mindanao.
Kini human malipayon nila nga gidawat ang dugang kahimanan gikan sa city govt sa dakbayan aron magamit sa paspas nga pagtumbok sa mga tawo nga natakdan sa maong sakit.
Miingon si DoH 10 regional director Dr Adriano Suba-an nga dako’g matabang ang gihimong lakang ni City Mayor Oscar Moreno aron daghan ang kinabuhi nga masalbar batok sa maong sakit.
Gihimo ni Suba-an ang reaksyon nunot sa pagpirma nila ni Moreno sa memorandum of agreement sa maong katuyuan.
Samtang modaghan pa ang maatiman nga swab specimen gikan sa suspected COVID-19 positive nga mga pasyente ang diha sa Northern Mindanao Medical Center o NMMC ning syudad.
Kini tungod sa dugang kahimanan nga magamit sa NMMC human laing duha ka RT-PCR machines ug ubang kahimanan ang gi-donar sa city govt aron maoy magamit sa pag-determinar sa mga pasyente nga natakdan sa bayrus.
Namahayag si NMMC medical director Dr Jose Chan nga wala lamang sila naka-pokus sa mga residente sa syudad ug lalawigan apan bisan ang Zamboanga ug Caraga regions ang kabahin sa hatagan sa pag-atiman gamit ang multi-million peso nga gasto sa city hall batok COVID-19.
Samtang kabahin sa pagpalig-o’g balik sa ekonomiya kon nganong naka-pokus ang city hall sa paghupot sa dugang kagamitan nga anaa sa DoH-10 ug NMMC aron epektibo mabatukan ang kuyanap nga coronavirus disease.
Kini ang pagpasabot ni City Mayor Oscar Moreno kon nganong angay ipalig-on ang health equipment sa maong mga ahensiya nga dunay epekto sa kahimtang sa ekonomiya sa rehiyon.
Miingon ang mayor nga kinahanglang ipalig-on una sa gobierno ang depensa sa panglawas sa katawhan aron mapabalik ang kumpiyansa sa mga negosyante kinsa grabeng apektado usab sa pandemya.
