CAGAYAN DE ORO CITY – Maka-floating status ang board of directors ingon man ang tag-as nga opisyales nga kasamtangang nagdumala sa pinakaunang water district sa nasud nga mao ang Cagayan de Oro Water District o COWD.
Kini human tahasi ni Pres Bongbong Marcos ang Local Water Utilities Administration o LWUA nga idumala ang tanang kalihukan sa COWD sulod sa unom ka bulan gumikan sa isyu sa disputed payables ngadto sa kompanyang Metro Pacific Water nga gidumala sa Cagayan de Oro Bulk Water Incorporated o COBI.
Una niini,gibutyag ni Marcos sa iyang pagbisita dinhi sa syudad nga gitawagan ug gihangyo niya ang tag-iya sa MetroPac nga si Manny V. Pangilinan o MVP nga ibalik ang pagpaagas sa tubig.
Kini tungod kay dili angayang mapihig sa pagbaton sa limpyo nga tubig ang katawhan sa dakbayan.
Sa pikas bahin,lahi usab ang paningkamot sa city govt pinaagi sa pagdangop sa korte aron magbaton sa temporary restraining order.
Gani,nakakuha’g lugway hangtod Hunyo 3 ang city govt sa TRO sa korte aron padayong mag-agas ang tubig sa kabalayan sa 1/3 population sa unang distrito sa syudad.
Samtang tun-an sa kasamtangang naglangko sa hunta direktiba sa COWD ang pagduso’g legal action kon tinud-anay nga kontrolon sa LWUA ang padumala ug operasyon sa panubig sa dakbayan.
Kini ang pasiunanang reaksyon ni COWD board of director Dr. Gerry Caño nunot sa mando ni Marcos nga ipaubos una sa LWUA control ang city water district gumikan sa daghang isyu nga giatubang niini.
Una nang nakaabot sa atensyon ni Marcos ang problema sa COWD ug COBI kay naglatugi sila kabahin sa minilyong bayrunon sa tubig nga gisuplay sa katawhan sa dakbayan.
Hisayrang ang COWD natukod tuig 1973 diin pinakaunang water district sa tibuok nasud.
