CAGAYAN DE ORO CITY-Gipalig-on pa sa Cagayan de Oro Water District o COWD ang ilang kampanya batok sa water interruption nga sagad moigo kon agian sa kalamidad ang syudad.
Kini human misulod sa laing kasabutan ang COWD kauban ang usa ka grupo gikan sa Netherlands aron tun-an ang mga kasamtangang pasilidad niini sa syudad.
Miingon si COWD Assistant General Manager Engr Beinvenido Batar Jr nga daghang grupo ang malambigit niini ilabina nga tuyo usab nga batukan sa maong kasabutan ang epekto sa climate change sa nasud.
Dugang ni Batar nga mo-epekto ang maong proyekto sa Hulyo ning tuiga hangtod sa 2023.
Samtang gihagit sa komitiba sa public utilities sa konseho ang COWD nga dili hunungan ang pagpangita’g labing epektibo paagi aron mamintinar ang kalidad nga pagserbisyo sa ilang mga konsumante.
Kini human nakadayeg si Kagawad Bong Lao kinsa chairman sa komitiba sa gisudlan nga kasabutan sa COWD ug ang kompanya nga nakabase sa The Netherlands.
Miingon si Lao nga gusto usab kining makakuha’g impormasyon kabahin sa gihimo sa COWD aron makahatag sa pagpasabot sa katawhan pinaagi sa ilang mga sesyon sa konseho.
