CAGAYAN DE ORO CITY – Nag-antos na sa P5.2 bilyones nga alkanse sa ilang operasyon sa panubig ang Cagayan de Oro Water District (COWD) sugod tuig 2018 hangtod 2021.
Kini ang pagsaysay ni Local Water Utilities Administration (LWUA) administrator Ronnie Ong kabahin sa kasamtangang kahimtang sa COWD operations ning syudad.
Gi-basehan ni Ong ang unod sa findings sa Commission on Audit (COA) nga ilang gihuptan ug gihimong reperensiya sa pag-takeover sa COWD aron mapangitaan sa mga sulbad ang kasamtangang pinansyal ug operasyonal nga kahimtang niini.
Namahayag kini nga nangutang pa ang COWD sa Development Bank of the Philippines ug mismong LWUA kay aron sulbaron ang suliran sa non-revenue waters apan katingad-an kay nagsaka na hinoon sa sobra 50 porsiento sukad tuig 2018.
Gisampit usab ni Ong ang P938,000 nga nagasto sa paggamit sa gasolina nga giingong walay mga resibo ug trip tickets sugod petsa 1 hangtod Abril 28, 2022.
Pinakagrabeng gikatingad-an ug dakong kuwestiyon alang sa LWUA ang COA findings diin dunay mga pondo nga P352 milyones sa tuig 2021 ug P182 million sa 2022 nga gibalhin sa lain-lain nga accounts.
Apil sa gi-red flag sa COA findings sumala ni Ong ang upat ka meting sa COWD’s board of directors nga gilangkuban sa tulo ka beses sa usa ka higayon samtang laing pakigtagbo sa sunod nga adlawa.
Kini ang nag-unang hinungdan nga nakahukom ang LWUA nga mihimo’g 6-months intervention pinaagi sa interim board of directors ug manager alang sa pagsulbad sa kahimtang sa COWD.
Sa pagkutlo ning balita, wala pa’y nahatag nga katin-awan ug pagpasabot niini ang COWD kabahin sa gipangsampit ni Ong.
