CAGAYAN DE ORO CITY – Gisaway sa on-floating status board of directors ang daw ‘overkill’ nga aksyon sa interim officials nga gitahasan sa Local Water Utilies Administration o LWUA nga temporaryong idumala ang water distrit sa syudad.
Kini human mikatap sa social media nga puwersadong gisirad-an ang opisina ni on-hold COWD General Manager Engr. Antonio Young.
Namahayag si on-floating status COWD board of director Dr Gerry Caño nga dili kini angay buhaton sa kasamtangang nagdumala kay naghatag lamang sa kangil-ad sa imahen sa buhatan.
Insulto alang sa kampo nila Caño ang pugsanong pagpabakwit sa ilang general manager ug daw napakaulawan atubangan sa mga konsumante nga nakasaksi sa komosyon.
Gani, bisan silang Caño wala magtoo nga musangko sa pagpatawag sa pulis ang gipatuman nga “silent protest” sa pipila ka mga trabahante sa water district nga nagsuporta kang Young.
Una niini, gi-angkon ni Caño gikan sa mga trabahante ug konsumante ang iyang impormasyon nga nakuha kalabot sa pisikal nga pagsita kang Young sulod sa iyang opisina ug gi-eskortehan sa mga pulis ayha gipadlakan.
Si Caño namahayag nga gisugo ni interim COWD General Manager Fermin Jarales ang iyang staff nga ipasulod ang mga pulis ug siya mismo ang nakighinabi kang Young nga mugawas sa iyang lawak.
Samtang bakak ug dili tinood nga gipadlak sa interim officials ang buhatan sa temporaryong napadaplin nga general manager sa COWD nga si Young.
Tubag kini ni Jarales nunot sa pasiatab ni Caño nga nagka-tensyon gumikan sa pagpapahawa kang Young sa opisina niini.
Namahayag si Jarales nga siya ang temporaryong mipuli sa buhatan ni Young aron dunay personal nga pag-monitor sa gasulod-gawas nga komunikasyon sa COWD.
Gani,temporaryong maka-work from home una si Young aron ubsan ang tensyon sulod sa ilang opisina.
Samtang gikompirmar usab ni Jarales nga naglusad sa prayer rally ang COWD union workers tungod sa hitabo.
Apan siya miingon nga kon may higayon kini,apilan niya ang prayer rally ilabina ning adlawa aron managsama nila ipaabot sa kahitas-an ang ilang hangyo alang sa serbisyong panubig sa syudad.
