CAGAYAN DE ORO CITY – Dili suliran alang sa interim officials sa Cagayan de Oro Water District o COWD nga dunay himoong prayer rally ang mismong mga empleyado niini sa kasamtangang kahimtang sa pagdumala sa panubig sa dakbayan.
Kini human gisugdan ang maong lakang sa mga empleyado sa COWD-Kauswagan ning syudad nunot sa tinguha nga ikahupay sa kasamtangang kahimtang niini.
Nagsumikad ang mga paglitok sa mga pag-ampo sa mga empleyado kay nakahatag sa sagol nga pagbati ang temporaryong pagpasira sa mismong buhatan sa naka-hold nga general manager nga si Engr.Antonio Young epektibo ning semanaha lamang.
Miingon si interim COWD General Manager Fermin Jarales nga kon dili ikadaot sa panerbisyo sa publiko ang lakang sa mga empleyado,walay angay ikabalaka ug mismo pa kini ang mohatag sa iyang suporta.
Gani,gilayong gidalikyatan ni Jarales ang maong mga empleyado ug mihatag sa pagpasabot nga wala sila misulod sa COWD aron mosabwag kagubot apan gisugo sila sa Malakanyang aron makatabang.
Nunot niini,lauman nga laing prayer rally nga ilusad ang COWD union workers sa mismong main office sa Corrales Avenue ning syudad ugmang adlawa.
