CAGAYAN DE ORO CITY – Gisiguro ni Chief PNP Gen Diocardo Carlos nga preparado ang Police Regional Office 10 alang sa pag-abag ug paghatag seguridad sa 2022 elections sa rehiyon.
Kini human mihimo sa command visit si Carlos sa PRO-10 ug gisusi ang kaandam sa iyang tropa diha sa Camp Alagar ning syudad.
Gibutyag ni PRO 10 spokesperson Lt Col Michelle Olaivar nga may gidugang lamang nga gamay’ng suhestiyon ang opisyal aron mo-align ang preparasyon sa rehiyon sa ubang mga lugar sa nasud.
Una nang gitahasan ni Carlos si PRO 10 Director Brig Gen Benjamin Acorda Jr nga bantayan ang ilang mga pulis nga dili magamit sa pipila ka politiko bugti sa salapi nunot sa piliay sa Mayo.
Miingon si Olaivar nga hangtod nga maapas pa sa iskedyul ni Carlos duawon niini ang tanang regional offices sa maong katuyuan samtang wala pa moabot ang iyang mandatory retirement.
Hisayrang gitakda ang pag-retiro ni Carlos sa dili pa mahitabo ang mismong adlaw sa piliay sa nasud.
