(Update) CAGAYAN DE ORO CITY- Supak ang liderato ng Communist Party of the Philippines-New People’s Army- National Democratic Front (CPP-NPA-NDF) nga may dautan nga mahitabo kang Pangulong Rodrigo Duterte.
Kini bisan nga kanselado na ni Duterte ang peacetalks tali sa grupong komunista.
Sa paghinabi sa Bombo Radyo,gibutyag ni NDF peace consultant Alfredo Mapano alyas Ka Pares nga bugtong si Duterte lamang sa tanang mga pangulo sa nasud ang tinood nga adunay pagpakabana ngadto kanila.
Kini ang hinungdan nga dili sila gusto nga mabutang sa peligro si Duterte kay siya lamang ang gapaminaw kanila.
Giangkon ni Ka Pares nga dili madali ang pagkab-ot sa malungtaron nga kalinaw hinungdan nga may mga higayon nga makasinati kini sa mga seryosong pagsulay.
Si Ka Pares ang kanhi binilanggo sa Misamis Oriental Provincial Jail tungod sa mga kasong kriminal apan gibuhian aron molambigit sa peacetalks sa Norway ug Italya.
Sa pagkakaron,lisod nang makit-an si Ka Pares tungod kay kabahin siya sa 21 ka peace consultants sa CPP-NPA-NDF nga ipasikop ni Duterte tungod sa paghagba sa peacetalks.
