CAGAYAN DE ORO CITY – Gihangyo sa kanunay sa tribung-lumad ang mga nabiling miembro sa Communist Party of the Philippines – New People’s Army nga hingpit nang isalikway ug ilubong sa kalimot ang armadong pakigbisog nga nagtinguha ipahagba ang gobierno.
Mensahe kini sa bag-ong regional tribal chieftain nga si Benedicto del Puerto nga ilado usab nga si Datu Kawilihan Mansikampo igo pagkahuman sa ilang pagpanumpa sa bag-ong tahas aron panguluhan ang IP’s Regional Judiciary Council for Tribal Justice (IRJCTJ) Northern Mindanao mismo sa Court of Appeals Mindanao nga nakabase sa 14th Street,Brgy Nazareth sa syudad.
Gibutyag ni Datu Kawilihan nga wala sila’y hunong nga pagdani sa NPA rebels ug supporters nga mobalik na sa sabakan sa balaod aron manginabuhi nga normal kuyog sa ilang mga nabiyaan nga pamilya.
Namahayag si Del Puerto nga dili sila mawad-an sa paglaum nga moabot ang ensaktong higayon nga madala nila pagbalik sa kapatagan ang ubang mga rebelde nga aron kalikayan na ang dugang mga panag-away gamit ang mga armas.
Gihimo niini ang mensahe tungod sa impormasyon sa militar kaniadto nga 90 porsiento sa mga lumad ang dali mahaylo ug masakop sa armadong kalihukan.
