CAGAYAN DE ORO CITY – Gibubu-an pa’g dugang puwersa sa Armadong Kusog sa Pilipinas pinaagi sa 4th Infantry Division ‘Diamond Troopers’ ang pipila ka lugar sa Caraga region dinhi sa Mindanao.
Kini human kompirmaha ni 4ID commander Major General Jose Maria Cuerpo II nga ang guerilla front committee 30 na lang sa Communist Party of the Philippines-New People’s Army (CPP-NPA) ang tiwasunon aron hingpit nang mahugno ang armadong kalihukan sa Northern Mindanao-Caraga regions.
Siya miingon nga dugay nang nabungkag sa ilang tropa sukad gilusad ang internal security operations ang walo ka guerilla front committees nga naglihok sa maong mga rehiyon.
Gibutyag sa heneral nga tratado na nga huyang ang nabiling front committee sa CPP-NPA nga nakabase sa Surigao provinces diin naghulat na lang sila nga mismo ang unified command nila ang mo-deklara niini nga bungkag na kini ug wala na’y kapas.
Kini ang rason nga nabuhos ang dakong presensiya sa militar sa Caraga kay sub-regional committees na lang ang naglihok sa NorMin area nga kaya nang mapulbos sa 403rd Infantry Batallion nga nakabase sa Bukidnon.
Hisayrang ubos sa 4ID area,ubay-ubay’ng top CPP-NPA commanders na ang nadakpan,nag-surender ug ang uban nga misukol sa military operations ang nakalas sa area of responsibility sa Caraga ug NorMin regions.
