CAGAYAN DE ORO CITY – Napun-an pa ang paghuyang sa armadong kalihukan sa CPP-NPA nga naglihok sa mga bukirang sakop sa Amihang Mindanao ug rehiyon sa Caraga.
Kini human kompirmaha ni 58th IB,Philippine Army commander Lt Col. Christian Uy nga napatay sa ilang tropa si Dionisio Micabalo alyas Muling kinsa nagsilbing secretary general sa North Central Mindanao Regional Committee nga dunay area of operation dinhi sa rehiyon ug didto sa Caraga.
Miingon si Uy nga unang natigayon ang 10 minutos nga engkuwentro tali sa iyang tropa batok sa bana-banang napulo ka sakop sa SENTRO DE GRAVIDDAD MTJ Eagles sa Sub-Regional Committee 1 ubos ni Ka Muling sa Brgy Libertad,Gingoog City,Misamis Oriental.
Namahayag ang army official nga ang 61 anyos nga si Micabalo nga lumad taga-Dancagan,Bukidnon ang nabawian sa armas AK-47 rifle;kalibre punto 22 rifle ug personal nga kabtangan sa encounter site sa miaging adlaw’ng Miyerkules.
Subay sa datos sa AFP,si Micabalo ang gitumbok nga utok sa daghang binuhatang kriminal nga sagad nahitabo sa Misamis Oriental,Bukidnon ingon man porsyon sa Agusan del Norte ug Agusan del Norte sa Caraga region.
Nagbaton usab kini sa kasong rebellion,double murder with frustrated murder,arson ug pagsupak sa Republic Act 9851.
Dugtong niini,giaghat ni 4th ID commanding officer Major General Jose Maria Cuerpo III ang mga kauban ni Ka Muling nga dili ipatigbabaw ang kasuko apan paspas nang motahan balik sa gobierno samtang may igo pa nga panahon nga sila ma-proteksyonan pa sa kagamhanan.
Dumduman usab nga dinhi sa Northern Mindanao partikular sa lungsod sa Impasug-ong,Bukidnon napatay sa militar ang CPP-NPA’s Mindanao operations commander nga si Joerge Madlos alyas Ka Oris sa miaging katuigan.
