CAGAYAN DE ORO CITY – Wala’y na-monitor ang militar nga dunay gilusad nga pagpanghasi ang rebeldeng New People’s Army ubos sa area of responsibility sa eastern side sa Misamis Oriental.
Kini alayon sa pagsaulog sa maong grupo sa laing armadong pakigbatok sa gobierno kagahapong adlawa.
Miingon si 1Lt Vincent Mark Maddul,civil military operation sa 58th IB,Philippine Army nga posibleng wala kini himu-a sa mga rebelde kay tulo sa ilang combatant fronts ang nabungkag na sa militar sa miaging katuigan sa lalawigan.
Siya miingon nga mas maayo nga mokanaug na lang sa mga nabiling mga rebelde sanglit wala na’y lider ang CPP-NPA tungod sa kamatayon ni Jose Maria Sison.
Samtang sa pikas bahin,mabungkag sa hingpit kon ibubo sa gobierno ang dakong puwersa sa estado inabagan sa suporta sa katawhan ang mga kalihukan sa CPP-NPA dinhi sa nasud.
Kini ang gisulti ni Police Regional Office 10 Director Brig Gen Lawrence Coop sa pangutana kon may puruhan pa ba nga mahugno ang armadong pakigbisog nga gipasiugdahan sa grupong komunista sa Pilipinas.
Miingon ang heneral nga gamit ang tanang resources ug hingpit nga pagsalikway sa publiko sa idolohiya nga gipakatag sa maong grupo,mapadali ang pagbungkag niini.
Gihimo ni Coop ang mensahe dungan sa pagtahan sa laing tulo ka NPA rebels sa Camp Alagar ning syudad sa miaging adlaw.
