CAGAYAN DE ORO CITY – Gihuptan na sa pamilya Dormitorio ang draft sa kasong ipasaka sa kapolisan batok sa pito ka kadete nga nakasupak sa anti-hazing law sulod sa Philippine Military Academy o PMA sa Baguio City.
Kini human pursigido ang kapolisan isip public complainant nga ipasaka ang kasong pagsupak sa anti-hazing law sa mga kadete nga gipanguluhan ni Cadet 1st Class Axl Ray Sanopao nga gikamatay ni PMA Cadet 4th Class Darwin Dormitorio niadtong Setyembre 18, 2019.
Miingon si Dexter Dormitorio nga gi-rebyo na nila ang unod sa kaso sa dili pa kini ipasaka sa piskalya sa city prosecutors office sa Baguio City.
Siya miingon nga gusto nila nga maseguro nga lig-on ang iduso nga kasong kriminal batok sa mga suspetsado.
Gipaabot usab sa ilang pamilya ang pagpasalamat tungod sa paspas nga resulta sa imbestigasyon.
Samtang kumbinsido si Pres Rodrigo Duterte nga dili mawala ang kultura sa hazing sa PMA.
Reaksiyon kini sa presidente sa pagkamatay ni PMA Cadet 4th Class Darwin Dormitorio tungod sa hazing sa akademya.
Asoy ni Duterte nga bisan siya ang nabiktima usab sa hazing kaniadto sa dihang mi-apil sa fraternity diin tulo ka adlaw siyang na-ospital.
Nagtoo ang presidente nga mawala lamang ang hazing kon mahimo na kining heinous crime.
