Aminado ang buhatan sa City Social Welfare and Development (CSWD) nga nagatubang sila og gamayng hagit sa pagpadangat sa ilang serbisyo ngadto sa duha ka barangay sa syudad nga naapektuhan sa sunog.
Matod ni CSWD Disaster Head Sofia Tongson, tungod sa kadako sa populasyon nga kinahanglan tabangan, limitado lamang ang ilang kapanguhaan, personahe ug resources sa buhatan.
Bisan pa niini, padayon gihapon ang ilang paningkamot aron matabangan ang mga biktima sa Barangay Lapasan ug Puntod.Giingon pa ni Tongson nga sukad sa unang adlaw sa insidente, naghatag na sila og pagkaon alang sa community kitchen ug padayon usab ang koordinasyon sa mga kapitan sa barangay.
Dugang pa niya, dako ang panginahanglan tungod kay kapin usa ka libo ka tawo ang kinahanglan pakan‑on adlaw‑adlaw, busa dili sayon ang sitwasyon sa mga responder.
Matod pa ni Tongson, nagtinabangay ang CSWD ug mga barangay officials aron mapadayon ang pagserbisyo bisan pa sa kakulang sa resources. Sa pagkakaron, nagpadayon ang pagmonitor ug paghatag sa kinahanglanong suporta sa mga apektadong pamilya.
