Kasamtangang givalidate karon sa buhatan sa City Social Welfare and Development (CSWD) inubanan sa Barangay Lapasan ug Puntod ang mga katawhang nabiktima sa dakong sunog nga miulbo sa duha ka barangay sa syudad.
Matod ni CSWD Disaster Head Sofia Tongson, sa inisyal nga lista adunay 203 ka pamilya o 680 ka indibidwal nga apektado sa San Isidro, Lapasan samtang 278 ka pamilya o 776 ka indibidwal usab sa Barangay Puntod.
Giingon usab ni Tongson nga aduna pay ubang pamilya nga wala pa makaadto sa evacuation center ug uban nagpabilin sa lain‑laing temporaryong kapuy‑an, maong gipalugway ang oras sa paglista ug pag‑validate sa datos.
Dugang pa niya, magsugod usab ang dugang beripikasyon sa Barangay Lapasan aron masiguro nga walay doble nga pangalan sa listahan sa duha ka barangay.
Matod pa ni Tongson, limitado ang personnel apan gipaninguhaan nga mahuman ang sakto ug limpyo nga validation sa kapin 400 ka pamilya nga naapektuhan.
Sa pagkakaron, padayon ang koordinasyon sa CSWD ug mga kapitan sa barangay aron mapaspasan ang paghatag sa hustong ayuda sa mga biktima.
