Nanawagan ang buhatan sa City Social Welfare and Development (CSWD) sa mga katawhan nga gustong modonar alang sa mga pamilyang nabiktima sa sunog sa Barangay Lapasan ug Puntod niadtong Lunes.
Matod ni CSWD Disaster Head Sofia Tongson, ang mga donasyon sama sa pagkaon, sinina ug uban pang kinahanglanon mahimong idiretso sa Barangay Lapasan o sa ilang evacuation centers sa Lapaz Uno ug Santo Niño Covered Court.
Giingon usab niya nga sa Barangay Puntod, mahimong ihatud ang donasyon sa North City Central School nga giablihan isip evacuation site o sa barangay hall.
Dugang pa niya, modawat usab ang CSWD sa City Hall sa mga donasyon sulod sa regular office hours gikan alas‑otso sa buntag hangtod alas‑singko sa hapon, samtang nagapadayon ang ilang 24‑oras nga response operations.
Matod pa ni Tongson, dako kaayo ang tabang sa suporta sa komunidad aron matubag ang panginahanglan sa mga apektadong pamilya.
Sa laing bahin, nanawagan usab siya sa publiko nga mag‑amping batok sa sunog ilabi na sa mga butang nga mahimong tinubdan niini sama sa mga loose connection ug delikadong wiring sa mga panimalay.
