CAGAYAN DE ORO CITY – Gisugdan na ni acting Armed Forces of the Philippines -Eastern Mindanao Command commander Maj Gen Jose Maria Cuerpo II ang iyang bag-ong tahas sa tibuok lugar sa Mindanao region.
Kini human siya tudlua sa AFP headquarters nga panguluhan ang EastMinCom nga gibakante ni Lt Gen Greg Almerol nga nag-retiro na sa serbisyo tungod sa mandatory retirement age didto sa Camp Panacan,Davao City.
Mismo si AFP Deputy Chief of Staf Lt Gen Charlton Sean Gaerlan ang nangulo sa simpleng seremonya alang sa pagretiro ni Almerol ug paghulip usab ni Cuerpo.
Si Almerol kinsa sakop sa PMA Makatao Class of 1989 ang nagsilbing EASTMINCOM commander sukad tuig 2021 samtang si Cuerpo nga apil sa PMA Bigkis-Lahi Class of 1990.
Tungod niini,kasamtangan pa gihapon i-dumala ni Cuerpo ang 4th ID,Philippine Army samtang wala pa’y mapili ang national headquarters aron mopuli kaniya gumikan sa iyang bag-ong tahas.
Si Cuerpo ang kanhi usab kumander sa 103rd IB,Philippine Army nga nakabase sa Marawi City ayha nadestino sa makadyot sa national headquarters ug nabalik sa Mindanao aron panguluhan ang ‘Diamond Troopers’ nga nakabase sa Camp Evangelista dinhi sa syudad.
Dili bag-o si Cuerpo sa mga operasyong-militar sa Mindanao kay lumad kining naggikan sa Iligan City,Lanao del Norte.
