Nagpadayon ang paningkamot ni John Barry T. Tayam, usa ka magtutudlo ug SC petitioner, sa pagduso sa iyang petisyon sa Korte Suprema aron kwestiyonon ang kausaban sa curriculum sa DepEd.
Subay sa pamahayag ni Tayam, usa sa iyang dakong kabalaka mao ang pagkunhod sa core subjects gikan sa kinse ngadto na lang sa lima, apil na ang pagtangtang sa mga strands nga giisip niyang mahinungdanon alang sa mga estudyante.
Gawas niini, gipunting usab niya ang panginahanglan sa dugang nga mga guidance counselor sanglit kulang ang suporta sa mga tulunghaan diin ang usa ka counselor kasamtangang nag-atiman og tulo ka mga eskwelahan.
Bisan pa man sa maong hagit, nagpabilin ang paglaom ni Tayam nga pinaagi sa pakigtambayayong sa lehislatibo ug ehekutibo nga sanga sa gobyerno, makab-ot ang gikinahanglang aksyon alang sa kalamboan sa sektor sa edukasyon.
