CAGAYAN DE ORO CITY – Nangayo na’g tabang ang Bureau of Customs -Cagayan de Oro sa NBI-10 aron mapadali sa PNP ang ilang pagsulbad sa pagpusil kang Deputy Collector for Assessment Arthur Sevilla Jr sulod sa pinuy-anan niini sa Brgy Bugo sa syudad.
Kini human unang gikondinar ni Customs Collector John Simon ang gidangatan ni Sevilla kinsa nagbaton sa daghang igo pinusilan sa kalibre 45 nga armas gikan sa motorcycle in tandem suspects sa miaging semana.
Gibutyag ni Customs -CdeO spokesperson Angelo Andrade nga luwas na sa kuyaw nga kahimtang ang biktima apan nangayo una sila’g pribasiya samtang naglagsik kini sa panglawas sulod sa ospital ning syudad.
Samtang gikinahanglan sa PNP ang kooperasyon ug dugang impormasyon ni Sevilla aron mapadali ang pagsulbad sa pagsulay’g patay kaniya.
Gibutyag ni City Director Col Henry Dampal nga gipalihok usab nila ang city investigators sa COCPO aron mapadali ang pagtumbok sa utok sa kremin ug ang motibo niini.
Miingon si Dampal nga wala pa nila direkta mahinabi si Sevilla tungod usab sa pagkasulod niini sa intensive care unit ug gipaubos sa operasyon tungod sa mga bala nga milubong sa iyang lawas.
