CAGAYAN DE ORO CITY – Tuyo nang kontrolon ni City Mayor Rolando ‘Klarex’ Uy ang kalihukang politika sa kabarangayan pinaagi sa pasado nga ordinansa sa boto nga 12 batok 5 gamit ang buhis gikan sa katawhan.
Miingon si Konsehala Yvy Emano nga klaro sa balaod nga dili manghilabot ang usa ka mayor sa mga kalihukan nga ipadagan sa brgy officials aron kalikayan ang pagsilbing political partisan niini.
Kini human gitinguha sa administrasyon nga ipalig-on ang matag-purok pinaagi sa pagbutang sa consultants ug lideres apan suwelduhan sa city hall.
Samtang daw dili pagsapaw apan pagpalig-on lang sa socio-economic ug health services ang sugo sa ordinansa kon nganong pasudlan sa city hall consultants ug purok leaders ang kabarangayan sa syudad.
Kini ang depensa ni City Council Majority Leader Kag Edgar Cabanlas sa kagustuhan ni Uy nga mabutang sa maong dugang city hall employees sa mga brgy.
Namugos si Cabanlas nga anaa na sa moderno nga panahon ang syudad rason nga dili usab angay mapihig sa batakang serbisyo ang katawhan.
Apan alang usab kang Konsehala Imee Moreno nga duplikasyon sa trabaho sa kabarangayan ug personal-politikal interes lamang ang tuyo sa purok system nga gustong ipatuman sa administrasyon ni Uy.
Miingon si Moreno nga labing maayo nga idugang na lang sa gamay’ng suhulan sa brgy workers ang gamiton nga pondo aron e-suweldo sa purok consultants ug leaders nga ipamugos sa mayor.
Siya miingon nga dili prioridad sukwahi sa gipamugos sa city govt ang purok system kay mas daghan pa ang sulbarunon sama sa langan nga mga suhulan sa mga empleyado sa city hall.
Gibarugan sa batan-ong Moreno nga dakong insulto sa barangay officials ang himoon sa administrasyon sanglit dili mga pinili sa mga tawo ipangbutang nga consultant ug purok leaders.
Sa pikas bahin, dili daw prioridad ang socio-economic ug health services apan political clustering ang gihimo sa administrasyon ni Uy sa ordinansa nga gipasar sa konseho kabahin sa purok system.
Kini ang subay sa nakita sa kanhi bise-mayor nga si CWGG 10 convenor Atty Antonio Soriano sa maong isyu nga gilantugian sa konseho ning semanaha.
Miingon si Soriano nga maayo nga politikanhon lakang alang sa interes sa mayor ang gipa-trabaho niya sa konseho apan duna kini disbintaha pag-abot sa liderato sa kabarangayan.
Apan admitado si Kag. James Judith nga politikanhong-interes ang numero nga tuyo sa purok system nga dili bag-o sa matag-local govt unit sama dinhi sa dakbayan.
Kini bisan kon hugot gihimakak sa mayoriya sa konseho ug namugos nga pagtunol sa batakang serbisyo lamang sa katawhan ang tuyo niini.
Miingon si Judith nga dili sila pribadong mga tawo sulod sa konseho apan nagkupot sa ilang katungdanan gumikan sa pagsulod nila sa politika.
