CAGAYAN DE ORO CITY-Gipadumduman karon sa grupo nga Citizens Watch for Good Governance o CWGG-10 ang mga kongresista nga mipabor sa laraw sa gobierno nga subli pagpatuman sa silot kamatayon partikular sa mga konbiktado tungod sa ilegal drug trade sa nasud.
Gibutyag ni CWGG convenor Atty Antonio Soriano angay magduki-duki sa mga magbabalaod aron ilang masayran nga signatory ang Pilipinas sa international law diin miuyon nga wad-on na ang silot kamatayon.
Si Soriano miingon angay ila-ilahon sa mga magbabalaod ang nalatid sa International Covenant on Civil and Criminal Rights aron basehan sa ilang pag-desisyon sa 3rd and final reading sa balaodnon sa death penalty sa kongreso.
Samtang gitratar ni Cagayan de Oro 2nd District Rep Maxi Rodriguez nga gaan sa iyang konsensya ang pagbotar sa balaodnon diin nagtumong ibalik pagsilot batok sa mga konbiktadong drug traders sa nasud.
Kini ang hinungdan nga suportado niya ang balaodnon nga maoy gihangyo kanila ni Pres Rodrigo Duterte.
Namugos si Rodriguez nga wala sila pugsa sa Malakanyang aron suportahan ang death penalty bill nga anaa na sa 3rd and final reading sa kamara de representantes.
Sa pikas bahin,giila ni Iligan City Lone District Rep Frederick Siao nga pag-disiplina sa katawhan ug sa mga opisyal sa gobierno ang ipahamtang nga silot-kamatayon batok sa makit-ang sad-an sa illegal drug trade sa nasud.
Kini ang iyang basehan kon nganong misuporta siya sa laraw nga ipatuman pagbalik ang silot kamatayon nga balaodnon sa kamarabaha.
Himoon ang 3rd and final reading sa death penalty bill sa kongreso sa Marso 7 ning tuiga.
Samtang padayong gibarugan sa simbahang katolika nga walay katungod ang tawo nga musilot ug pagpatay sa iyang isig-ka-ingon.
Matud ni Msgr. Percious Cabunoc,rector sa San Agustin Metropolitan Cathedral nga ang labaw nga makagagahom lamang ang may kapas nga mukuha sa kinabuhi sa tawo.
Iyang gipamugos nga mas gidapigan sa simbahan ang life imprisonment aron mabati usab sa nakasala ang pag-antos sa iyang mga sala ug mareporma sulod sa prisohan.
Nagtoo si Cabunoc nga makahatag sa pangit nga imahe sa international community ang pugsanong pagduso sa mga magbabalaod sa kamarabaha sa death penalty.
