Giabisuhan sa Department of Agriculture 10 ang mga mag-uuma sa rehiyon nga mangandam alang sa posibleng epekto sa El Niño sa sunod nga unom ka bulan base sa forecast sa PAGASA.
Matud ni Dir. Jose Apollo Pacamalan Regional Executive Director sa DA-10, bisan pa og usa lang ka bulan ang giingong below-normal ang ulan, gikinahanglan gihapon ang igong preparasyon aron malikayan ang dako nga kadaot sa mga pananom.
Hinuon, gipasalig sa ahensya nga gi-identify na nila ang mga food production areas sa rehiyon nga makasuporta gihapon sa pagpanguma bisan pa og moabot ang maong huwaw.
Gipahinumdoman usab sa maong opisyal ang mga mag-uuma nga magsugod na og tanom og mga drought-tolerant nga mga tanom sama sa kamote ug uban pang root crops samtang anaa pa ang igong ulan.
Ingon man usab, gipaniguro ni Pacamalan nga anaa na ang suplay sa mga binhi sa humay ug mga utanon alang sa pagpananom nga aktibong gisuportahan sa ilang buhatan.
