CAGAYAN DE ORO CITY– Gidawat nga dakong hagit sa Dept of Agriculture o DA -10 ang unod sa State of the Nation Address o SONA ni Pres Bongbong Marcos ang kabahin sa pagkab-ot o pagbaton sa matag-pamilyang Pilipinhon sa kasiguraduhan sa igong suplay sa pagkaon matag-adlaw.
Kini ang tubag ni DA 10 regional director Jose Pacamalan nunot sa unang pagtuki ni Marcos sa sektor sa agrikultura nga dayag gikadasmaya sa katawhan kay pakyas matuman ang saad nga balik-20 pesos ang kilo sa bugas.
Miingon si Pacamalan nga daghang babag kon nganong galisod pagkab-ot ang gobierno niini rason nga padayon nila kini gipangitaan sa tukmang sulbad.
Gani,mismo dinhi sa Northern Mindanao dili bastante ug permi kulangon ang suplay sa bugas nga konsumuhon sa katawhan gumikan sa kakulang niini.
