Palpak nga pagka presidente si Bongbong Marcos, busa, dili na kwestiyonable kung ang singgit sa katawhan karon mao ang “Marcos Resign!” Prankahay kini nga reaksiyon ni Ben Tiu Contreras, usa ka anti-war advocate. Sa iyang pakighinabi sa Bombo Radyo, mipadayag si Contreras nga angay nang mo-resign ug mapulihan ang presidente tungod sa nadugang nga mangil-ad nga rebelasyon ug alegasyon batok kaniya. Gibutyag ni Contreras nga aron masalbar ang nasud sa kaulaw nga gidala sa administrasyon sa atubangan sa kalibutan, mas maayo nga mokanaog na ang pangulo. Para niya, wala’y klarong kausaban nga nabuhat ni Marcos Jr.
