Gisaway ni kanhi Misamis Oriental Vice Governor ug ekonomista Joey Pelaez ang dako nga utang ug underspending sa gobyerno tungod sa pagkunhod sa pondo alang sa mga batakang proyekto ug serbisyo pampubliko.
Gipasabot ni Pelaez nga imbes ibuhos ang pondo sa mga pasilidad ug tunghaan nga makapukaw unta sa ekonomiya ug makahatag og trabaho sama sa Build, Build, Build program ni kanhi Presidente Rodrigo Duterte, gipagamay hinuon ang gastos niini.
Dugang pa sa kanhi opisyal, nakatala og P10 billion nga confidential fund ang opisina sa presidente nga walay pormal nga imbestigasyon.
Gibutyag usab niini nga nidako ang maong sekretong pondo sa lokal nga pamunoan diin miabot sa P210 million ang sa lalawigan sa Misamis Oriental samtang P450 million usab ang sa dakbayan sa Cagayan de Oro nga duda niyang gipanggamit lang sa election.
