Nakaapekto sa mga serbisyo sa Microsoft 365, lakip ang Outlook, Microsoft Teams ug Copilot, ang dakong pagkapalong sa sistema nga nagsugod niadtong Huwebes, Nobyembre 12, ug mipadayon hangtud Biyernes, Nobyembre 13, 2026, nga nakabalda sa operasyon sa mga ahensya sa gobyerno, mga airline ug mga kompanya sa pinansyal sa nagkadaiyang nasud.
Milapas sa 12 ka oras ang maong pagkabalda, nga nakaapekto ilabina sa mga serbisyo nga nagsalig sa Exchange Online, ang plataporma sa Microsoft alang sa email ug komunikasyon.
Tungod niini, napugos ang pipila ka kompanya sa pinansyal sa pagkumpirma sa mga transaksyon pinaagi sa fax, samtang nalangan ang pipila ka pahibalo sa mga korporasyon bahin sa ilang pinansyal nga resulta ug nagkaproblema usab ang mga konektor sa Microsoft nga gigamit sa mga kompanya sa artificial intelligence sama sa OpenAI ug Anthropic.
Matud sa Microsoft, ang insidente nalambigit sa mga problema sa mga server nga wala makasugakod sa dagan sa mga hangyo, ug wala kini makakita og timailhan nga resulta kini sa malisyosong kalihokan sa internet.
Gipahibalo usab sa kompanya nga nakapatuman na kini og mga lakang aron mapalig-on ang mga server ug nakita na ang unang mga timailhan sa pag-ayo sa serbisyo, bisan pa nga nagpadayon pa ang ilang paningkamot aron mapasig-uli ang normal nga operasyon. (raniel mahunyag)
