CAGAYAN DE ORO CITY-Mokabat sa 200-mil ang structural damage sa pagkasunog sa lima ka panimalay sa Mendoza St. Brgy Puntod ning syudad kaganihang buntag.
Matud ni BFP investigator SFO1 Imelda Barasan nga posibleng madugangan pa ang ihap sa mga panimalay sa sunog ilabina nga paspas ang pagkaylap sa kalayo tungod kay gama sa light materials ang mga panimalay.
Gibutyag usab niini nga duha ka bombero ug duha ka sibilyan ang naangol sa maong sunog.
Nagpadayon pa ang imbestigasyon niini sa hinungdan sa pagdilaab sa kalayo.
Samtang nakaangkon sa first-degree burn sa dagway ang usa ka ginang human iyang gibalikan ang kwarta sa nasunog niya nga karenderya.
Sumala ni Luisa Ragmac nga nawad-a’g panimoot ang iyang inahan nga si Annabelle Ragmac, 42-anyos, human makaangkon sa daghang samad ug sunog sa kalawasan ilabina sa iyang dagway sa dihang gibalikan niini ang kwarta taliwala paman nga gilamoy na sa kalayo ang ilang tindahan.
Nahimo usab nga emosyonal si Mary Joy Parojinog sa dihang nahurot kaugdaw ang ilang duha ka andanang panimalay.
Sumala ni Parojinog nga wala niya matabang ang pagpalong sa kalayo tungod kay mitambong siya’g graduation sa iyang anak.
Maoy iyang naabtan sa iyang pagpauli ang iyang balay nga naugdaw na sa sunog.
Hisayran nga ang panimalay ni Parojinog giingong adunay mga renters ug gikabutyag nga nagsumikad ang sunog sa kwarto sa usa sa mga nag-abang sa ilang balay.
