CAGAYAN DE ORO CITY-Gipukaw sa dakong sunog ang katawhan nga nahinanok pa sa katulugon diha sa Brgy Patag sa syudad kaganihang kadlawon.
Kini human miulbo ang kalayo sa pinuy-anan ni Generosa Quijano nga mikuyanap sa mga silingan niini hinungdan sa dakong sunog.
Gibutyag ni BFP regional director Sr/Supt Domingo Tambalo nga wala nila gisalikway ang anggulo sa electrical short circuit nga hayan hinungdan sa maong sunog.
Kabahin sa naapil pagkasunog ang mga pinuy-anan nila ni Ricky Beceno;Julibeth Mahinay;Virginia;Henry Beceno ug Bonifacio Adalia nga pulos nagpuyo sa maong dapit.
Gibutyag ni Tambalo nga inisyal nga uno punto singko milyon pesos ang structural damage sa sunog,hinoon,walay tawo nga naangol atol sa sunog.
Samtang hatagan sa pasiunang tabang pinansyal sa konseho ang unom ka pamilya nga apektado sa dakong sunog diha sa Zone 5,Brgy Patag sa syudad kaganihang kadlawon.
Nangadlawon sa pag-responde si Patag Brgy Kap Marycor Calizo aron mangunay pag-atiman sa mga apektadong pamilya.
Mohimo usab sa brgy session ang mga opisyal ning buntaga aron mahikay ang pagpagawas sa emergency fund alang sa mga nasunugang pamilya.
Una niini,migawas ang report nga may mibuto sa usa sa mga boarding house nga gilayong gisundan sa dakong kalayo.
