Milusad sa laing hugna sa lihok protesta ang grupo sa mga mag-uuma sa Bukidnon, aron patubagon ang Department of Agrarian (DAR) -10 ang ilang yangongo sa pagclaim sa ilang yuta.
Sa interview sa Bombo Radyo, namahayag si Pat Pangantihon, ang Policy and Communications Officer sa Philippine Movement for Climate Justice (PMCJ) sa Mindanao nga padayon ang ilang panawagan sa DAR-10 nga hatagan sa hustisya ang mga mag-uuma nga dugay nang nagpaningkamot nga makabaton sa yuta nga ilang gi-uma sulod sa daghang dekada.
Tuig 2011 pa nagsugod ang revalidation sa Certificate of Land Ownership Award (CLOA), apan nasubli ang revalidation sa tuig 2017.
Gipalanog ni Pangantihon nga mibati sa tumang kabalaka ang mga mag-uuma kay basin mu-abot nalang ang ilang kamatayon, dili pa nila mahuptan ang titulo sa ilang gitikad nga yuta.
Nagtuo ang PMCJ nga intensyonal ang paglangan sa pagproseso sa pagkuha sa CLOA kay sa Agusto 2024, subli gisaaran sa opisyal sa DAR-10 ang mga mag-uuma nga subayon ang ilang claims sa yuta, apan muabot nalang ang usa ka tuig, wala pa kini aksiyoni sa ahensya.
Giila kini sa grupo nga isip sistematikong pagpanglimbong ug pagpangilog sa yuta nga hangtud karon nagpadayon sa Bukidnon.
Gisuportahan sa PMCJ ang mga lokal nga grupo sa mag-uuma sa ilang mga rally ug dayalogo aron ipadayag ang ilang tinuod nga kahimtang ug panawagan sa gobyerno.
