CAGAYAN DE ORO CITY-Makig-atbang si kanhi City Councilor Candy Darimbang kang City Mayor Oscar Moreno sa 2019 midterm elections sa syudad.
Kini human giindorso sa Partido Federal ng Pilipinas o PFP si Darimbang nga modagan pagka-mayor batok Moreno sunod tuig.
Miingon si Darimbang kinsa city director usab sa maong partido ning syudad nga gihan-ay pa nila ang ilang line up sanglit kaalyansa niini ang Padayong Pilipino-Hugpong ng Pagbabago ug Centrist Party of the Philippines o CDP ning syudad.
Gihimo ni Darimbang ang kumpirmasyon mismo paghuman sa ilang pagpanumpa sa PFP sa USTP gym,Brgy Lapasan sa syudad kagahapong adlawa.
Samtang gitahod ni kanhi City Mayor Vicente ‘Dongkoy’ Emano ang tinguha ni Darimbang pagpapili sa taas nga posisyon sa midterm elections sa syudad.
Kini human unang gikompirmar sa Bombo Radyo ni Darimbang nga gituboy siya sa ilang Partido Federal ng Pilipinas aron panguluhan ang kampanya sa syudad.
Miingon si Emano nga wala siya’y ikasaway kang Darimbang kay wala mamansahe ang dungog niini batok sa isyu sa kurapsyon.
Una usab niini,gipasalig ni Moreno kinsa magpapili sa ikatulo nga termino nga pabiling pokus lamang siya sa trabaho ug wala kabalak-i kon kinsa ang sunod ikaatbang niini sa piliay.
