Gipanghimatuod ni Garry Alejano, kanhing Magdalo Partylist Representative nga igo na ang testimonya sa mga “self-confessed hitman” nga sila Edgar Matobato ug Arturo Lascañas aron mapamatud-an ang paglungtad sa Davao Death Squad (DDS).

Sumala ni Alejano, dako ang personal nga kahibalo ug kasinatian sa duha gikan pa sa panahon nga si Duterte mao pa ang alkalde sa Davao City.

Miangkon si Matobato ug Lascañas nga aktibo silang miyembro sa DDS ug nakasaksi sa sistema sa grupo sama sa pagbayad sa mga miyembro ug listahan sa mga target nga indibidwal.

Gipadayag usab ni Alejano nga bisan wala si Matobato sa national level, maklaro niyang masabtan ang pamaagi sa Davao nga gisunod usab sa giyera kontra droga sa tibuok nasud.