Giakusahan ni Davao City Mayor Baste Duterte ang kasamtangang administrasyon nga nagalihok sama sa usa ka sindikato tungod sa giingon niyang paglapas sa saktong proseso sa balaod ug ang pagpamugos nga makig-kooperasyon sa International Criminal Court (ICC).
Matod pa sa mayor, usa ka dakong insulto ug pagbudhi sa soberanya sa nasud ang pagtugot o pag-agi sa gawasnon untang sistema sa hustisya sa Pilipinas ngadto sa usa ka langyaw nga hukmanan.
Alang kaniya, ang pag-ambak sa lokal nga mga hukmanan ug ang pag-atras-abante sa baroganan sa gobyerno kalabot sa ICC nagpakita nga murag gi-organisa kini nga “mga lihok-sindikato” aron lamang mapuntirya ug mapailalom sa paglutos ang ilang pamilya ug mga kaalyado.
Dugang pa niya, dili kini ang matang sa hustisya ug gobyerno nga angay ug deserve sa mga Pilipino.
