CAGAYAN DE ORO CITY-Gidagsa sa blood gallooners ang tinuig nga pagpahigayon sa Dugong Bombo diha sa Limketkai ning syudad sa miaging Sabado.
Kini human kabahin sila si Rene Mortola nga taga- Villanueva, Misamis Oriental ug LTO-10 employee Reynaldo Lasponias nga mipakuha sa ilang dugo atol sa maong proyekto.
Miingon si Mortola nga kanunay kining nagpakuha’g dugo tungod kay nasayod siya sa maayong ihatag niini sa iyang lawas.
Samtang gibutyag usab ni Lasponias nga nagpakuha siya’g dugo tungod kay gusto niya magamit kini ngadto sa mga sundalo nga nagbuhis kinabuhi sa kagubot didto sa Marawi City.
Samtang gitabok sa grupo sa kabatan-unan ang isla sa Camiguin,makadonar lamang sa dugo sa 2017 Dugong Bombo diha sa Atrium,Limketkai Mall ning syudad.
Kini human gitinguha sa grupo ni Enrico Badana gikan sa Mambajaon,Camiguin nga mahatag ang ilang dugo sa mga sundalo nga nakig-away batok sa mga teroristang Maute-ISIS sa Marawi City.
Miingon si Badana nga batasanon na niini ang pagpakuha ilabina nga mopatsada ang pamati niya sa lawas kon makuhaa’g dugo.
